Celtas i ibéricus
Antañu, Estremaúra estaba na zona indoeuropea de la península ibérica. Las sus tierras huerun ocupás pol pueblus emparentáus colus celtas peru nu mesmamenti celtas, pueblus de los que sabemus poquina cosa: que llegarun pa l’añu 1000 antis de Cristu, a últimus de l’Edá del Bronci, que quiciás tenían algu que vel colus ilirius i los liguris i que eharun los famosus escritus d’Arroyu del Puercu. Peru tous estus pueblus estuvun mu influíus polus sus vedinus, los íberus, que tenían el su propiu alfabetu, que los nuestrus antepasáus tomarun prestáu. Asina, los arqueólogus an encontráu pieras escrebías n’íberu en Monfragüi i Cañamero, bien lehus de las zonas del meyudía i del levanti, ondi vivían los ibéricus. Na "piera de Monfragüi", se lei CONCULTIRU i, na de Cañamero, TARIRA. Son las palabras mas viehas escrebías pol un estremeñu. N’esti alfabetu tamién s’an encontráu nombris de presona, comu Arantonis, Macilo, Miro, Togeta, nombris tous ellus celtas. Esa lengua, con el tiempu, hue esapareciendu hasta el su fin cola romanización d’Estremaúra.
No hay comentarios:
Publicar un comentario